සිහනද Lion's Roar: 2024

Monday, March 25, 2024

ආදරිය

ඔමරි හිනාවට ආලෙ බඳිනවා

ලස්සන නුඹ ලඟ හිත නවතිනවා

ඉඟි බිඟි බැල්මට මසිත සැලෙනවා

සිහිනෙන් මම නුඹෙ දෙතොල් සිඹිනවා

හැරී බලනවා කැකිරි පලනවා

රවා බලනවා නොපෙනි යනවා

නුඹෙ හැඩරුව දැක සිහිසුන් වෙනවා

නුඹ මා රවටනවාද සිතෙනවා

සිදාදියෙන් සිටු කුමරෙක් එනවා

උඡාරුවට නුඹ කැන්දන් යනවා

තනියම බැඳි පෙමෙ දුක උහුලනවා

නුඹ රුව හදවතේ ඇඳි තියෙනවා

මා ආ මාවත

මම ලේඛණයට ආසාකරමි. ලිවීමට මට ආසාව ඇතිවුයේ කියවීමට තිබු දැඩි කැමත්ත නිසාය. කුඩාකල සිටම අතට අසුවන දකින ඕනෑම දෙයක් කියවීම මගේ පුරුද්දක් විය. පාසලේ මෙන්ම ගම්සබාවේ පුස්තකාලයෙන්ද පොත් ගෙන කියවිම මෙන්ම ගෙදරට ගන්නා සියලුම පත්තර කියවිම දිගටම සිදුවුනා. මටත් මේ විදිහට ලියන්න පුලුවන්නම් කියන හැඟීම ඇතිවුනා. ගුවන් විදුලියේ හඳමාමා පිටුවට නිතරම තැපල්පත් යැව්වා. ගමේ පාසලේ බිත්ති සඟරාවට ලියුවා. පානදුර සුමංගල විදුහලට ගියපසු විදුහලේ සාහිත්‍ය සඟරාව වන සුමගුල් හඬ ටත් විද්‍ය සඟරාවවන විද්‍යා චින්තා වටත් ලියුවා. ඒ කාලයේම කවි සහ වෙනත් නිර්මාණ ගුවන් විදුලියේ සොඳුරු සෙවන සහ අඟහරුවාදා පිළිසඳර ට යැව්වා. ඒවා ප්‍රචාරය වුනාම ඇතිවුනේ පුදුම සතුටක්. පලමුවෙන්ම කවියක් පලවුනේ ශ්‍රී සඟරාවේ. ඉන්පසු තරුණයා පත්‍රයේ පලවුනා. දිගින් දිගටම ගුවන් විදුලියේ වැඩසටහන් වලට මෙන්ම වෙළඳ සේවයේ වෙළඳ වැඩසටහන්වල අසන ප්‍රශ්නවලට පිලිතුරු ලිව්වා. තෑගි දිනුවා. සරසවියට ගියාට පස්සේ ලිවිම ටිකක් නැවතුනා. ඉඳහිට පිටරටවල සඟරාවල දේවල් පරිවර්තනය කරල පත්තරවලට සඟරාවලට යැව්වා. සිළුමිණ පත්තරේ වගේම එවකට තිබු මනහර සඟරාවල ඒවා පලවුනා.

සරසවියෙන් ඉගෙනුම අවසන්කරල එහිම තාවකාලික ආචාර්ය වරයෙක් ලෙස කටයුතුකරන කාලෙ මා එක්ක තනිකඩ නිලනිවාසයේ එකමකාමරයේ හිටිය පිඨයේ පුස්තකාලයාධිපති වීරසුරියගේ බලවත් ඇවිටිල්ල මත ආයේ ලියන්න පටන් ගත්තා. මේ වතාවේ ලිවිවෙ ශාස්ත්‍රීය ලිපි. රිවිරැෂ, දවස වගේම මහවැලියෙන් කරප ුඉසුර සඟරාවට ලිව්වා. ලිවිම සඳහා මුලින්ම ගෙවිමක් ලැබුනා ඉසුර සඟරාවේ පලකරපු ලිපියකට. තාවකාලික ආචාර්ය ධුරයෙන් ඉවත්වෙලා කෘෂිකර්ම දෙපාර්තමේන්තුවෙ රක්ෂාවටගියාට පස්සෙ ආයෙමත් ලිවිම නතරවුනා. එහි වැඩිකලක් නොසිට නැවතත් සරසවියේ ස්ථිර ආචාර්යවරයෙක් වුනාට පස්සෙ තනිකඩ නිලනිවාසෙ ඉන්නකාලෙ හිටිය සිංහල අංශයේ ආචාර්යවරයෙක්වු හේරත් ආයෙත් ලියන්න උන්නදු කලා. ඒත් ලියුවෙ ශාස්ත්‍රීය ලිපි. සරසවියෙ සඟරාවලට, විවිධ පාසල්වල සාහිත්‍ය හෝ විද්‍යා සඟරාවලට, දිනමිණ, දිවයින පත්තරවලට ලිව්වා. ආයෙ වතාවක් ගෙවිමක් ලැබුනා දිනමිණ පත්තරේ පලවුන ලිපියකට. විවිධ හේතුනිසා විදේශගතවිම් නිසා ලිවිම ආයෙත් නැවතුනා. 2004 වසරෙ සිට නැවතත් ලියන්න ගත්තා. මේ වතාවේ විදෙස් බාසාවලින් ලියවුන කෙටිකතා පරිවර්තනය ට වැඩි ආසාවක් ඇතිවුන නිසා පරිවර්තන කෙටිකතා දිවයින සිළුමිණ ලක්බිම පත්තරවල පලකලා.

කැනඩාවට ඇවිත් ටිකකලක් යනකොට හිතුන ලියන්න ඕන කියල. ටොරොන්ටෝ වල පලවන දසත සහ යාත්‍රා පුවත්පත් වලට කෙටිකතා කවි සහ වෙනත් විවිධ ලිපිලියන්න ගත්තා. දසත ට වසර හතරක් පමණ කාලයක් ගුරාගෙ කොලම නමින් තීරු ලිපියක් ලිව්වා. ඒකට හොඳ ප්‍රතිචාර ගොඩක් ලැබුනා. වසර හතරකට පස්සෙ ගුරාගෙ කොලම නවත්තල ආගිය කතා නමින් ලිපි පෙලක් ලියන්න ගත්තා. රූපණ අන්තර්ඡාල රූපවාහිණි වැඩසටහනෙත් සමහර අවස්තාවලදි විවිධ වැඩසටහන්වලට සම්පත් දායකයෙක් ලෙස සහබාගි වෙනවා. සවන අන්තර්ඡාල ගුවන්විදුලියට සතිපතා වැඩසටහනක් කරනවා සිංහල සිනමා ගී චාරිකාව නමින් සිංහල චිත්‍රපට ගී සහ චිත්‍රපටපිලිබඳව සොඳුරුමතකයන් ඉදිරිපත්කරමින්. ඉඳහිට ලංකාවේ පත්තර වලටත් පරිවර්තන කෙටිකතා යවනවා. මේ සියල්ලම එක්කරල ඡවිරුබ්ලොග් අඩවිය තුලින් ඔබ හමුවට ඒමට අදහස්කලා. සිහනද නමින් එන ඡවිරු බ්ලොග් අඩවිය පිලිබඳ ඔබේ අදහස් යෝඡනා දන්වන්නේනම් ස්තුතියි.